Home ఎడ్యుకేషనల్/జాబ్స్ తెలంగాణ రాష్ట్రం, ఆంధ్రప్రదేశ్ రాష్ట్రాల్లో జిల్లా పరిషత్

తెలంగాణ రాష్ట్రం, ఆంధ్రప్రదేశ్ రాష్ట్రాల్లో జిల్లా పరిషత్

175
0
భువనగిరి జిల్లా పరిషత్​ కార్యాలయం

–వికాస్​ రుషి

తెలంగాణ రాష్ట్రంలోని 33 జిల్లాలు, ఆంధ్రప్రదేశ్​లోని 17 జిల్లాలున్నాయి. ఈ జిల్లాలకు జిల్లా పరిషత్​ చైర్మన్లు ఉంటారు. ఆంధ్రప్రదేశ్ పంచాయతీరాజ్ చట్టం 1994 ప్రతి జిల్లాకు ఒక జిల్లా పరిషత్‌ను ఏర్పరచింది. ఓటరు జాబితాలో పేరు నమోదై 21 సంవత్సరాలు నిండినవారు జిల్లా పరిషత్ సభ్యునిగా పోటీ చేయడానికి అర్హులు. ఇద్దరికంటే ఎక్కువ మంది పిల్లలున్న వారు పోటీ చేయడానికి అనర్హులు. జిల్లా పరిషత్‌లోని ప్రతి ప్రాదేశిక నియోజకవర్గం నుంచి ఒక సభ్యుడిని ఎన్నుకుంటారు. వీరు జిల్లాపరిషత్తులో సభ్యులవుతారు. జిల్లా పరిషత్‌కు చెందిన సభ్యులు పార్టీ ఆదేశానుసారం ‘చేతులెత్తే’ విధానం ద్వారా తమలో ఒకరిని ఛైర్మన్‌గా, మరొకరిని వైస్ ఛైర్మన్‌గా ఎన్నుకుంటారు. ఎవరైని సభ్యుడు పార్టీ ఆదేశాన్ని ధిక్కరిస్తే అతని సభ్యత్వం రద్దవుతుంది. జిల్లా పరిషత్ సభ్యులు, ఛైర్మన్, వైస్ ఛైర్మన్‌ల కాలపరిమితి అయిదేళ్లు.  

ఆ జిల్లాలోని శాసనసభ్యులు, జిల్లాలో ఓటరుగా నమోదైన MLCలు, ఆ జిల్లాలోని లోక్‌సభ సభ్యులు, ఆ జిల్లాలో ఓటరుగా నమోదైన రాజ్యసభ సభ్యులు సమావేశాల్లో పాల్గొనవచ్చు కానీ ఓటుహక్కు ఉండదు. ఆ జిల్లా ఓటర్లుగా నమోదైన ఇద్దరు మైనారిటీ సభ్యుల్ని కో-ఆప్ట్ చేసుకుంటారు. కో-ఆప్ట్ చేసుకున్నవారికి ఓటు హక్కు ఉంటుంది. జిల్లా పరిషత్​ సమావేశాలకు శాశ్వత ఆహ్వానితులు: జిల్లా కలెక్టర్, జిల్లాలోని మండల పరిషత్ అధ్యక్షులు, జిల్లా గ్రంథాలయ సంస్థ ఛైర్మన్, జిల్లా కేంద్ర సహకార బ్యాంక్ ఛైర్మన్, జిల్లా మార్కెటింగ్ సొసైటీ ఛైర్మన్, వీరికి  ఓటు హక్కు ఉండదు.

జిల్లా పరిషత్‌లో 7 స్థాయి సంఘాలు

ప్రణాళిక, ఆర్థిక వ్యవహారాల స్థాయి సంఘం

అభివృద్ధి పనులు స్థాయి సంఘం

గ్రామీణాభివృద్ధి స్థాయి సంఘం

వ్యవసాయాభివృద్ధి స్థాయి సంఘం

సాంఘిక సంక్షేమ స్థాయి సంఘం

స్త్రీ, శిశు సంక్షేమ స్థాయి సంఘం

విద్య, వైద్య సేవల స్థాయి సంఘం

ఈ సంఘాలన్నింటిలో జిల్లా పరిషత్ ఛైర్మన్ సభ్యుడిగా ఉంటారు. అన్ని స్థాయి సంఘాలకు సభ్యులను జిల్లా పరిషత్ సభ్యులు ఎన్నుకుంటారు. ఆయా స్థాయి సంఘాల్లోని సభ్యులు తమరిలో ఒకరిని ఆ స్థాయీ సంఘం అధ్యక్షునిగా ఎన్నుకుంటారు. స్థాయి సంఘాల సమావేశాలు రెండు నెలలకు ఒకసారి తప్పనిసరిగా జరగాలి. ఏ రాజకీయ పార్టీకి చెందని వారిని, జిల్లా పరిషత్‌కు సంబంధించిన విషయాల్లో ప్రత్యేక నైపుణ్యం కలిగిన వారిని ప్రత్యేక ఆహ్వానితులుగా పిలవొచ్చు  కానీ వారికి ఓటు హక్కు ఉండదు.

సమావేశం ఏర్పాటు చేయకుంటే..

జిల్లా పరిషత్​ ఛైర్మన్ మూడు నెలలకు ఒకసారి సమావేశాన్ని ఏర్పాటు చేయాలి. ఏదైనా కారణంతో 90 రోజుల్లోగా సమావేశాన్ని ఏర్పాటు చేయని పక్షంలో ఛైర్మన్ తన పదవిని కోల్పోతాడు. పదవి కోల్పోయిన తర్వాత ఏడాది వరకు ఛైర్మన్‌గా ఎన్నిక కావడానికి అనర్హుడవుతాడు.

ఛైర్మన్, వైస్ ఛైర్మన్‌లపై ప్రవేశపెట్టే అవిశ్వాస తీర్మానంపై నిబంధనలు

పదవిలోకి వచ్చిన నాలుగేళ్ల తర్వాత మాత్రమే ప్రవేశపెట్టాలి. 2/3వ వంతు సభ్యుల సంతకాలతో కలెక్టర్‌కు, సీఈవోకు ఒక ప్రతిని అందించి, ఒక ప్రతిని పంచాయతీరాజ్ శాఖ కమిషనర్‌కు అందించాలి. అవిశ్వాస తీర్మానంపై కలెక్టర్ ఒక ప్రత్యేక సమావేశాన్ని ఏర్పాటు చేయాలి. సగానికంటే ఎక్కువ మంది హాజరై సాధరణ మెజారిటీతో తొలగించవచ్చు.

సీఈవో విధులు

జిల్లా పరిషత్ ముఖ్య కార్యనిర్వహణాధికారిని (సీఈవో) రాష్ట్ర ప్రభుత్వం నియమిస్తుంది. జిల్లా పరిషత్ ఛైర్మన్‌ను సంప్రదించి జిల్లాపరిషత్ సమావేశాలను సీఈవో ఏర్పాటు చేయాల్సి ఉంటుంది. కనీసం నెలకు ఒకసారి సమావేశాన్ని జరపాలి. చివరి సమావేశం జరిగిన తేదీ నుంచి 90 రోజుల లోపల మరో సమావేశం జరపనట్లయితే రాష్ట్ర ప్రభుత్వం సీఈవోపై క్రమశిక్షణా చర్య తీసుకుంటుంది. జిల్లా పరిషత్, స్టాండింగ్ కమిటీ సమావేశాలకు సంబంధించిన రికార్డుల్ని భద్రపరచి, ఆ సమావేశాలకు సంబంధించిన తీర్మానాల్ని సీఈవో అమలు చేయాల్సి ఉంటుంది. జిల్లా పరిషత్ కార్యకలాపాలపై సీఈవో పర్యవేక్షణ, నియంత్రణ ఉంటుంది. రాష్ట్ర ప్రభుత్వ ఆదేశాల్ని అమలు చేయడంతోపాటు, అమలుకు సంబంధించిన నివేదికలను ప్రభుత్వానికి పంపించి వాటి ప్రతులను ఛైర్మన్, వైస్ ఛైర్మన్‌లకు సీఈవో పంపించాల్సి ఉంటుంది.

LEAVE A REPLY

Please enter your comment!
Please enter your name here